БІЛІМ БЕРУДЕГІ ЖАСАНДЫ ИНТЕЛЛЕКТ: МӘСЕЛЕЛЕРІ МЕН ПЕРСПЕКТИВАЛАРЫ

Аннотация

Қазіргі таңда жасанды интеллект жаңа мүмкіндіктер мен қиындықтарды қамтитын білім берудегі маңызды құралға айналып отыр. Бұл мақала туындап отырған кейбір мәселелер мен ықтимал перспективаларға назар аудара отырып, білім беру үдерісіне жасанды интеллектті енгізуді қарастырады. Мақалада әр түрлі психологиялық-педагогикалық әдебиеттердегі «жасанды интеллект» түсінігіне берілген əртүрлі анықтамалар мен көзқарастарға талдау жасалған. Жасанды интеллект – адамдардың құзыретіндегі ерекше шығармашылық әрекеттерді орындайтын интеллектуалды жүйе немесе машина. Мақалада білім беру үдерісінде қолданылатын немесе енгізілуі мүмкін жасанды интеллект жүйелерінің негізгі түрлері берілген. Ғылыми әдебиеттерде жасанды интеллект технологияларын қолдануға негізделген интеллектуалдық оқыту жүйелері білім беру сапасын арттырудың тиімді құралы ретінде қарастырылады. Авторлар жасанды интеллект интеграциясына қатысты негізгі мәселелер мен перспективаларды қарастырды. Перспективалар контекстінде мынадай мәселелер қарастырылады: жекелендірілген оқыту мүмкіндіктері, білім беру бағдарламаларын білім алушылардың қажеттіліктеріне бейімдеу арқылы білім беру сапасын арттыру, педагогтардың күнделікті әкімшілік міндеттерін автоматтандыру.Мақала білім беруде жасанды  интеллектті енгізуге байланысты педагогтарды алмастыру қаупі, когнитивті функциялар мен еңбек қызметінің төмендеуі, технология мен интернет желісіне тәуелділік секілді орын алуы мүмкін мәселелерді де қарастырады. Сонымен қатар, мақалада білім беру саласында жасанды интелектті енгізу мен қолдану мәселесіне студенттердің қатынасы анықталып, зерттеу нәтижелері бойынша қорытынды тұжырымдар жасалды. Авторлар туындауы мүмкін мәселелерге қарамастан, білім беруде жасанды интеллектті қолдану перспективалары білім беру процесінің тиімділігі мен сапасын айтарлықтай жақсартуға мүмкіндік береді деген қорытынды жасайды.