ЖОҒАРЫ БІЛІМ БЕРУДЕГІ ЗАМАНАУИ ИНТЕРАКТИВТІ ТЕХНОЛОГИЯЛАР: ОҚЫТУ ТИІМДІЛІГІНЕ ӘСЕРІ

Аннотация

Аңдатпа. Жоғары білім берудің цифрлық трансформациясы жағдайында тек академиялық білімді ғана емес, сонымен қатар метапәндік құзыреттерді дамытуға мүмкіндік беретін интерактивті оқыту форматтарының рөлі артып келеді. Бұл зерттеу Қазақстан университеттері аясында бес технологияның — Flipped Classroom, Problem-Based Learning (PBL), кейстік әдіс, Collaborative Online International Learning (COIL) және геймификацияның тиімділігін бағалауға бағытталған. Әдіснамалық негізіне Scopus пен Web of Science деректер базаларында индекстелген 2015–2024 жж. аралығындағы 72 жарияланымның жүйелі шолуы, 18 оқу бағдарламасының контент-талдауы, 10 оқытушымен жүргізілген сұхбат және 68 студент қатысқан квази-эксперимент кіреді. Эксперименттік деректер студенттердің қорытынды нәтижелерінің 16 %-ға өскенін (p = 0,002; η² = 0,14) және оқу үдерісіне қатысу көрсеткіштерінің Лайкерт шкаласы бойынша 3,1-ден 4,2-ге дейін артқанын көрсетті. Сұхбат нәтижелері шектеулі ресурстар мен педагогтардың дайындық деңгейінің жеткіліксіздігін қоса алғанда, енгізуге кедергі болатын ұйымдастырушылық және әдістемелік факторларды растады. Зерттеудің практикалық маңызы — цифрлық инфрақұрылымды дамыту, оқытушылардың жүйелі біліктілігін арттыру және студенттердің қатысуын көпдеңгейлі индикаторлар арқылы (мінез-құлықтық, когнитивтік, эмоционалдық, әлеуметтік және ұзақ мерзімді) кеңейтілген мониторинг жүргізуді көздейтін кезеңдік жол картасын әзірлеу. Зерттеудің шектеуі — тек қалалық университет студенттерін қамту, бұл нәтижелердің репрезентативтілігін төмендетеді және болашақта кеңейтуді қажет етеді. Алынған қорытындылар білім беру стандарттарын жетілдіруде және жоғары білімді интернационалдандыру мен цифрландырудың ұлттық стратегиясын іске асыруда қолданылуы мүмкін.